[PRWC Party Documents] Stand For Socialism Against Modern Revisionism, January 15, 1992

MANINDUGAN SA SOSYALISMO BATUK SA MODERNO NGA REBISYUNISMO

Read in English Basahin sa Pilipino

Armando Liwanag, Tagapangulo, Partido Komunista sang Pilipinas

Enero 15, 1992

ANG REBISYUNISMO amo ang sistematiko nga pagbag-o kag paglisa halin sa Marxismo, sa mga basehan nga rebolusyonaryong prinsipyo sang proletaryado nga ginbalay nanday Marx kag Engels kag dugang ginpauswag sang mga masunod nga mangin-alamon kag mga lider sang sosyalista nga rebolusyon kag konstruksyon. Ang mga rebisyunista nagatawag sang ila mga kaugalingon nga Marxista, nagapabutyag pa gani nga nagahimo sang pagpauswag kag matinugahon nga aplikasyon sini apang sa esensya ginahimo nila ini agud patam-ison ang mga burges nga anti-proletaryado kag anti-Marxistang ideya nga ginapalapnag.

Ang mga klasikal nga rebisyunista nga nagdominar sa Ikaduha nga Internayunal sang 1912 ara sa mga sosyal-demokratikong partido nga naghulag bilang ikog sang mga burges nga rehimen nga nagsuporta sa mga badyet panggyera sang mga kapitalista nga pungsod sang Europa. Ginhimutig nila ang rebolusyonaryo nga esensya sang Marxismo kag ang kakinahanglanon sang diktadurya sang proletaryado, nag-entra sa burges nga repormismo kag sosyal pasipismo kag nagsuporta sa kolonyalismo kag moderno nga imperyalismo. Malig-on nga nagpanindugan si Lenin batuk sa mga klasikal nga rebisyunista, gindepensahan ang Marxismo kag ginpamunuan ang mga Bolsheviks sa pagtukod sang una nga sosyalistang estado sang 1917.

Ang mga moderno nga rebisyunista ara sa mga nagahari nga partido komunista sa Unyon Sobyet kag sa Nasidlangan nga Europa. Sistematiko nila nga ginarebisa ang mga basehan nga prinsipyo sang Marxismo-Leninismo paagi sa pagnegar sang nagapadayon nga pagluntad sang mga nagahimulos nga sahi kag mga banggianay sang sahi kag sang proletaryado nga kinaiya sang partido kag estado sa sosyalista nga katilingban. Kag nagpadayon sila sa pagguba sang proletaryado nga partido kag sang sosyalista nga estado gikan sa sulod. Nagmaskara sila bilang mga komunista bisan pa nga ginbuy-an na nila ang mga Marxista-Leninista nga prinsipyo. Ila gin-atake si Stalin agud islan ang mga prinsipyo ni Lenin sang mga ginpakalain na nga benertuldo sang iya mga sosyal demokratiko nga kabanggi kag nagaako nga nakahimo sang "matingugahon nga aplikasyon" sang Marxismo-Leninismo.

Ang lubos nga pagbagsak sang mga rebisyunista nga nagaharing partido kag rehimen sa Unyon Sobyet kag Nasidlangan nga Europa nagpahapos sangsa sadto para sa mga Marxista-Leninista agud sumahon ang pagtuhaw kag pag-uswag sang sosyalismo kag ang matawhay nga ebolusyon sang sosyalismo pakadto sa kapitalismo paagi sa moderno nga rebisyunismo. Kinahanglan nga tuytuyon ang bug-os nga istorikal nga liko kag magkuha sang mga husto nga leksyon sa atubang sang walay untat nga mga pagtinguha sang mga nagakontra sa Marxismo-Leninismo nga magsabwag sang pang-ideolohiya kag pangpulitika nga kagamu sa sulod sang mga ranggo sang rebolusyonaryong hublag.

Ang mga pinakakomon nga linya sang atake amo ang masunod: ang "tunay" nga sosyalismo wala gid nagluntad; kon nagluntad gid man nalatnan ini ukon gintorse sang "sumpa" sang "Stalinismo" nga indi matabog sang mga nagbulos sa iya nga anti-Stalin gani si Stalin amo ang responsable man asta sa mga anti-Stalin nga rehimen pagkatapos sang iya kamatayon; kag ang sosyalismo nagluntad tubtub 1989 ukon 1991 kag wala malutos sang moderno nga rebisyunismo antes sini ukon ang moderno nga rebisyunismo wala gid nagluntad kag isa ini sa indi matabangan nga "diperensya" sang sosyalismo nga nabagsak sang 1989-1991.

May ara, syempre, sang mga pagpadayon subong man indi pagpadayon sang mga panahon halin kay Stalin pakadto sa mga panahon pagkatapos ni Stalin. Pero ang syensya sosyal nagademanda nga ang isa ka lider responsable mayormente sa panahon sang iya pagpamuno. Ang mayor nga responsibilidad ni Gorbachov sa panahon sang iya pagpamuno indi dapat ipasa kay Stalin kaangay man sa kay Marcos, halimbawa, nga indi mapasa kay Quezon.

Kinahanglan tuytuyon ang pagpadayon sang panahon sa tunga sang rehimen ni Stalin kag mga rehimen pagkatapos ni Stalin. Kag kinahanglan man ang pagtumod. ang indi pagpadayon sang panahon, ilabi na bangud ang mga rehimen pagkatapos ni Stalin may kinaiya nga mga anti-Stalin. Sa atubang sang mga pagtinguha sang mga imperyalista, sang mga rebisyunista kag sang mga wala naremolde nga petiburgis sa pagpaathag sang tanan sa anti-Stalin nga pamaagi kag pagkondenar sa bug-os nga Marxismo-Leninismo, may ara mabaskog nga rason agud kilalahon ang mga matalom nga kinatuhay sa tunga sang rehimen ni Stalin kag mga rehimen pagkatapos ni Stalin. Ang penomenon sang moderno nga rebisyunismo nagakinahanglan sang igtalupangud, kon gusto naton ipaathag ang walay panabon-tabon nga pagpanumbalik sang kapitalismo kag burges nga diktadurya sang 1989-91.

Pagkatapos sang iya kamatayon, ang mga positibo nga kadalag-an ni Stalin (katulad sang sosyalista nga konstruksyon, ang pagdepensa sang Unyon Sobyet, ang mataas nga tantos sang pag-uswag sang ekonomyang Sobyet, paghatag sang garantiya sa mga pumuluyo, kag iban pa) nagpadayon pa sa konsiderable nga panahon. Amo man sa iya mga kasaypanan nga nagpadayon kag ginpadaku sang mga nagbulos sa iya asta sa punto nga indi na pagpadayunon ang sosyalismo. Ginatumod naton ang pagnegar sang pagtuhaw sang mga mapanghimulos nga sahi kag banggianay sang mga sahi sa katilingban nga Sobyet; kag ang wala naupangan nga pagtubo sang burukratismo.

Halin sa panahon ni Khrushchov pakadto sa malawig nga panahon ni Brezhnev asta sa panahon ni Gorbachov, ang dominante nga rebisyunistang kaisipan amo nga naagum na sang sahing anak-balhas ang iya mga makasaysayan nga buluhaton kag ini ang panahon para sa mga Sobyet nga lider kag mga sampaton sa estado kag nagharing partido nga magtalikod halin sa proletaryado nga panindugan. Ang murto ni Stalin amo ang ginbasol sang burukratismo kag iban nga kalautan. Apang sa kamatuoran, mismo ang mga moderno nga rebisyunista nagtib-ong sini kag sa interes sang nagadaku nga burukratikong burgesya.

Sa atubang sang pagkabagsak sang mga rebisyunista nga partido kag rehimen, may rason ang Partido sa pagsaulog kay napamatud-an ang kahustuhan sang iya Marxista-Leninista, anti-rebisyunista nga linya. Ang kahustuhan sang sini nga linya nakumpirmar sang lubos nga pagkabangkarote kag pagbagsak sang mga rebisyunista nga nagaharing partido, ilabi na ang Partido Komunista sang Unyon Sobyet, ang puno nga tagapalapnag sang moderno nga rebisyunismo sa kalibutanon nga sakop sugod sang 1956. Maathag nga napamatud-an nga ang moderno nga rebisyunistang linya nagakahulugan sang nahinabunan nga pagpanumbalik sang kapitalismo sa sulod sang malawig nga panahon kag sa katapusan nagapadulong sa walay panabon-tabon nga pagpanumbalik sang kapitalismo kag diktadurya sang burgesya.

Sa Pilipinas, ang grupo pangpulitika nga labing nahuy-an, nadulaan sang dungog kag nailo sa pagkabagsak sang mga rebisyunista nga nagaharing partido kag rehimen amo ang mga Lava kag ila sumulunod. Pat-ud nga indi ang Partido Komunista sang Pilipinas nga liwat gintukod sang 1968. Apang ang mga imperyalista, ang burges nga masmidya kag ang iban nga hubon nga buot magpagumon sang sitwasyon kag nagtinguha sa paglibak kag magpakahuya sa Partido sa pagkawasak sang mga rebisyunista nga nagaharing partido kag rehimen. Ginataghol nila ang indi amo nga kahoy.

May mga elemento nga nadaya sang mga dinalan sang Gorbachovista nga propaganda pareho sang "sosyalistang pagpanibag-o", "perestroika", "glasnost" kag "bag-ong kaisipan" kag wala magkilala sang kamatuoran bahin sa Gorbachovista nga pagpanunto bisan pagkatapos sang 1989, ang tuig sa diin ang moderno nga rebisyunismo nagsugod sa paghatag alagyan sa bukas kag hayag nga pagpanumbalik sang kapitalismo kag burges nga diktadurya. May ara gamay nga elemento sa sulod sang Partido nga padayon sa pagsunod sa napamatud-an na nga anti-komunista, anti-sosyalista kag paltik nga demokratikong ehemplo ni Gorbachov kag ang nagakwestyon kag nagaatake sa nagapanguna nga papel sang sahing mamumugon paagi sa Partido, demokratiko sentralismo kag sa sosyalista nga palaabuton sang rebolusyonaryong kahublagan Pilipino. Ang ila linya nagatuyo sang walay liwan kundi ang pagnegar sang mga basehang prinsipyo sang Partido, kag hanti, ang likidasyon sang Partido.